“Deprendiendo a medrar”, un curtiumetraxe con premiu

L’alumnáu de LLingua Asturiana y Lliteratura de 1º Bachilleratu (Alejandro Sanzo Alonso, Marta Sánchez García y Mónica Montoya Montoya), recibiera’l pasáu día 7 de mayu ún de los premios nel XII Certame de Creación Audiovisual n’asturianu pol curtiumetraxe “Deprendiendo a medrar” dientro de los certámenes escolares enmarcados na 45 Selmana de les Lletres Asturianes. Nesta obra, que te va prestar ver nel YouTube y restu de plataformes del centru, esploren trés aspeutos cruciales de la vida: la incertidume sobre’l futuru, la busca d’identidá personal y el deséu d’aceptación y sofitu por parte del entornu de so, onde’l mensaxe de conexón humana resuena nel públicu, enfatizando la importancia de la empatía y la comprensión mutua. Dientro del actu d’entrega de premios, cellebráu nel Teatru El Llar de Corvera, los nuesos estudiantes nun solo fueron reconocíos poles sos habilidaes, sinón que tamién gociaron d’actuaciones musicales y tuvieron l’oportunidá de conocer a otros alumnos y profesores de dellos centros de tola provincia asturiana. Esta esperiencia foi enforma enriquecedora y motivadora pa los nuesos alumnos, tando seguros de qu’esti ésitu ye namái’l primeru de munchos. Naomi Suárez González